Advertisement

राज्यशास्त्र संशोधन केंद्रात रघुनाथ महामुनी लिखित गोमाता काव्यसंग्रहाचे प्रकाशन

(मुरूम,प्रतिनिधी) :

येथील सेवानिवृत्त मुख्याध्यापक तथा साहित्यिक कविवर्य रघुनाथ ज. महामुनी कोंढेजकर लिखित गोमाता काव्यसंग्रहाचे श्री माधवराव पाटील महाविद्यालयाच्या राज्यशास्त्र पदवी-पदव्युत्तर व संशोधन केंद्रात मंगळवारी (ता.८) रोजी मान्यवरांच्या हस्ते प्रकाशन करण्यात आले. यावेळी प्रमुख अतिथी तुळजापूरच्या यशवंतराव चव्हाण महाविद्यालयातील राज्यशास्त्र विभाग प्रमुख प्रा. डॉ. आंबादास बिराजदार, नळदुर्गच्या कला, विज्ञान व वाणिज्य महाविद्यालयाचे राज्यशास्त्र विभाग प्रमुख प्रा. डॉ. निलेश शेरे, भौतिकशास्त्र विभागाचे प्रा. डॉ. सतिश शेळके, रोटरी क्लब मुरूम सिटी चे अध्यक्ष प्रा. डॉ. आप्पासाहेब सूर्यवंशी, वाणिज्य विभागाचे प्रा. डॉ. सुधीर पंचगल्ले, राज्यशास्त्र संशोधन केंद्राचे समन्वयक प्रा. डॉ. महेश मोटे आदींच्या प्रमुख उपस्थितीत काव्यसंग्रहाचे प्रकाशन करण्यात आले. यावेळी डॉ. बिराजदार म्हणाले की, हा काव्यसंग्रह म्हणजे अनुभवाच्या सागरातून उमटलेले अमूल्य मोती आहेत. त्यातील प्रत्येक कविता एक विचार देणारी आहे. वाचकांना या कवितांमधून केवळ सौंदर्याची अनुभूती मिळत नाही, तर जीवनाकडे पाहण्याचा नवा दृष्टिकोन मिळतो. या कविता केवळ वाचायच्या नाहीत, तर अनुभवल्या पाहिजेत. प्रकाशन कार्यक्रमाचे प्रास्ताविक तुळजापूरचे सचिन घाटे यांनी केले. सूत्रसंचालन शिवतेज भोसले तर आभार अमोल कटके यांनी मानले. यावेळी बहुसंख्येने विद्यार्थी-विद्यार्थिनी उपस्थित होत्या. फोटो ओळ : मुरूम, ता. उमरगा येथील राज्यशास्त्र संशोधन केंद्रात गोमाता काव्यसंग्रहाचे प्रकाशन करताना डॉ. आंबादास बिराजदार, डॉ. निलेश शेरे, डॉ. सतिश शेळके, डॉ. आप्पासाहेब सूर्यवंशी, डॉ. सुधीर पंचगल्ले, डॉ. महेश मोटे व अन्य.

म्हसवड येथे संत नामदेव महाराज संजीवन समाधी उत्सव तयारी बैठक उत्साहात संपन्न

म्हसवड (ता. माण) – येथील शिंपी समाज बंधू-भगिनींची बैठक संत शिरोमणी नामदेव महाराज यांच्या ६७५व्या संजीवन समाधी सोहळ्याच्या अनुषंगाने उत्साही वातावरणात पार पडली. ही बैठक समाजाचे सातारा जिल्हाध्यक्ष इंजि. सुनील पोरे यांच्या अध्यक्षतेखाली संपन्न झाली.

२२ जुलै रोजी होणाऱ्या या भव्य सोहळ्यासाठी साप्ताहिक पारायण, महाराजांची पालखीतून शहर मिरवणूक, ड्रेस कोड, महाप्रसाद आदी उपक्रमांचे नियोजन यावेळी उत्साहात करण्यात आले. यावेळी खेळीमेळीच्या चर्चेत महिला मंडळ, डॉ. फुटाणे, रमेश पोरे, राम चंदवाले, मनोज पतंगे, चंदु पोरे यांनी सक्रिय सहभाग घेतला. कार्यक्रमाचा अहवाल भिकू पोरे यांनी वाचून दाखवला.

कार्यक्रमाच्या यशस्वी आयोजनासाठी सौ. सुवर्णा पोरे, शार्दूल फुटाणे, संदीप नामदास, गणेश नामदास यांनी विशेष परिश्रम घेतले. शेवटी उपस्थितांचे आभार अश्विनी फुटाणे यांनी मानले.

या बैठकीच्या माध्यमातून संपूर्ण समाजामध्ये एकतेचा व अभिमानाचा सशक्त भाव निर्माण झाला असून, येणारा सोहळा भव्यतेने साजरा होणार याची झलक यामध्ये दिसून आली.

२० हजारांची लाच घेताना उपनिरीक्षक व हवालदार जाळ्यात.

सातारा ता,५(प्रतिनिधी) अत्याचाराचा गुन्हा दाखल न करण्यासाठी वाई पोलीस ठाण्यात चक्क २० हजार रुपयांच्या लाचेची मागणी केल्याचा धक्कादायक प्रकार उघड झाला. सातारा लाच लुचपत प्रतिबंध विभागाचे उपअधीक्षक राजेश वाघमारे यांच्या सापळा कारवाईन पोलीस ठाण्यातील पोलीस उपनिरीक्षक व हवालदार यांची खाबूगिरी चव्हाट्यावर आली. सातारा जिल्ह्यात वैविध्यपूर्ण कारवाई करून पोलीस दलाची मान राज्यात उंचावली असल्याचे एका बाजूला चित्र असताना दुसऱ्या बाजूला दक्षिण काशी म्हणून नावलौकिक प्राप्त वाईत अत्याचारासारखा गंभीर गुन्हा दाखल न करण्यासाठी वीस हजार रुपयांच्या लाचेची मागणी केली जाते. ही दुर्दैवी बाब धक्कादायक रित्या समोर आली. यामुळे संपूर्ण पोलीस दलात एकच खळबळ उडाली तसेच लाच लुचपत प्रतिबंध विभागाच्या कारवाईने त्या संबधित पोलीसांच्या खाबूगीरीची लक्तरे वेशीवर टांगली गेली. अत्याचार झाला त्याचं पुढं काय होणार ? याबातच्या चर्चा संपूर्ण दक्षिण काशी मध्ये सुरू झाल्या. गुन्हा दाखल न करण्यासाठी वाई सोबत अन्यत्र सुरू असलेल्या खाबूगिरीला यापुढे चाप बसणार का? असा प्रश्न देखील यानिमित्ताने उपस्थित झाला आहे.
वाई पोलीस ठाण्यात अत्याचाराचा गुन्हा दाखल न करण्यासाठी पोलीस उपनिरीक्षक व हवालदार यांनी चक्क २० हजार रुपयांच्या लाचेची मागणी तक्रारदार यांच्याकडे केली. १५ हजार रुपये स्वीकारताना सापळा कारवाईत दोघांना रंगेहात पकडण्यात आले. संशयित बिपीन बाळकृष्ण चव्हाण पोलीस उपनिरीक्षक,संशयित उमेश दत्तात्रय गहीण पोलीस हवालदार यांना याप्रकरणी ताब्यात घेतलं असून. लाच लुचपत प्रतिबंध अधिनियमानुसार गुन्हा दाखल करण्याची प्रक्रिया सुरू आहे.
याबाबत अधिक माहिती अशी की,
सातारा लाच लुचपत प्रतिबंध विभागाचे उपअधीक्षक राजेश वाघमारे यांच्याकडे वाई पोलीस ठाण्यात अत्याचाराचा गुन्हा दाखल न करण्यासाठी लाचेची मागणी केली असल्याची तक्रार प्राप्त झाली. तक्रारीच्या पडताळणीमध्ये तक्रारदारास शिवीगाळ दमदाटी करून हाताने चापटी मारून अटक करण्याची भिती दाखवून लाच मागणीस प्रोत्साहन दिले. असल्याची बाब समोर आली. तक्रारदार यांनी लाच मागणीस होकार दर्शवताच त्यास सांगेल तेव्हा साक्षीदार व्हायचं असे बोलून लाच मागणीस प्रोत्साहन दिले असल्याची माहिती लाच लुचपत प्रतिबंध विभागाने माध्यमांना प्रसिद्धीस दिलेल्या पत्रकात नमूद केली.
सातारा लाच लुचपत प्रतिबंध विभागाचे पोलीस उपअधीक्षक राजेश वाघमारे यांनी पथकातील पोलीस हवालदार नितीन गोगावले. गणेश ताटे,निलेश राजपुरे यांच्यासह वाई पोलीस ठाणे हद्दीत सापळा कारवाई केली. यामध्ये पोलिस उपनिरीक्षक व हवालदार १५ हजार रुपये लाच स्वीकारताना रंगेहाथ सापडले. त्याना चौकशी कामी ताब्यात घेत त्यांच्यावर लाच लुचपत प्रतिबंध अधिनियमा नुसार गुन्हा दाखल करून कारवाई करण्याची प्रक्रिया सुरू झाली आहे. सातारा लाच लुचपत प्रतिबंधचे उपअधीक्षक राजेश वाघमारे व टीमचे या करवाईबद्दल अभिनंदन होत आहे.

error: Content is protected !!